ಎಣ್ಣೆಯುಕ್ತ, ಚರ್ಮವನ್ನು ನಿಭಾಯಿಸಲು ನೀವು ಶ್ರಮ ಪಟ್ಟು ಪರಿಹಾರ ಕಾಣದೆ ದಣಿದಿದ್ದೀರಾ? ನಿಮ್ಮ ಎಣ್ಣೆಯುಕ್ತ ಚರ್ಮದ ಆರೈಕೆಯನ್ನು ನಿರ್ವಹಿಸುವ ನೈಸರ್ಗಿಕ ವಿಧಾನಗಳನ್ನು ಕಂಡುಹಿಡಿಯಲು ನೀವು ಬಯಸುವಿರಾ? ಹಾಗಿದ್ದರೆ ಇದಕ್ಕೆ ಹಲವು ಸುಲಭೋಪಾಯಗಳು ಇಲ್ಲಿವೆ .
Read this article in english Ayurvedic Home Remedies, Tips, Face packs for Oily Skin
ಎಣ್ಣೆಯುಕ್ತ ಚರ್ಮ ಎಂದರೇನು ?
ಚರ್ಮದಲ್ಲಿನ ಸೆಬಾಸಿಯಸ್ ಗ್ರಂಥಿಗಳು ಹೆಚ್ಚು ಸಕ್ರಿಯವಾಗಿದ್ದಾಗ ಮತ್ತು ಹೆಚ್ಚಿನ ಪ್ರಮಾಣದ ತೈಲವನ್ನು ಉತ್ಪಾದಿಸಿದಾಗ ಚರ್ಮವು ಎಣ್ಣೆಯುಕ್ತವಾಗುತ್ತದೆ . ಇದು ತ್ವಚೆಯ ಸುಂದರತೆಯನ್ನು ಕಡಿಮೆ ಮಾಡುವುದರ ಜೊತೆಗೆ ಬ್ಲ್ಯಾಕ್ ಹೆಡ್ಸ್, ಮೊಡವೆ ಮತ್ತು ಇತರ ಕಲೆಗಳಿಗೆ ಗುರಿಯಾಗುವಂತೆ ಮಾಡುತ್ತದೆ. ಎಣ್ಣೆಯುಕ್ತ ತ್ವಚೆಯು ಇತರ ಚರ್ಮದ ಪ್ರಕಾರಗಳಂತೆ ವೇಗವಾಗಿ ವಯಸ್ಸಾಗುವುದಿಲ್ಲ ಎಂಬುದು ಇದರ ಘನಾತ್ಮಕ ಅಂಶವಾಗಿದೆ.
ಎಣ್ಣೆಯುಕ್ತ ಚರ್ಮಕ್ಕೆ ಕಾರಣವೇನು?
ಎಣ್ಣೆಯುಕ್ತ ಚರ್ಮದ ಕಾರಣಗಳು ಹಲವಾರು ಇರಬಹುದು; ಇವುಗಳಲ್ಲಿ ಕೆಲವು ಕಾರಣಗಳು ಹದಿಹರೆಯ, ಗರ್ಭಾವಸ್ಥೆ ಮತ್ತು ಜನನ ನಿಯಂತ್ರಣ ಮಾತ್ರೆಗಳ ಬಳಕೆಯಂತಹ ಹಾರ್ಮೋನುಗಳ ಬದಲಾವಣೆಗೆ ಸಂಬಂಧಿಸಿವೆ. ದುರದೃಷ್ಟವಶಾತ್, ಹಾರ್ಮೋನ್‌ಗಳ ಕಾರಣದಿಂದಾಗಿ ಎಣ್ಣೆಯುಕ್ತ ಚರ್ಮವಿದ್ದಾಗ , ಇದಕ್ಕೆ ಉತ್ತಮ ಉಪಾಯವಿಲ್ಲ .
ಎಣ್ಣೆಯುಕ್ತ ಚರ್ಮಕ್ಕೆ ಮಿಕ್ಕ ಕಾರಣಗಳು ಆಹಾರ, ಆರ್ದ್ರತೆ, ಬಿಸಿ ವಾತಾವರಣ, ವಂಶವಾಹಿನಿಗಳು ಮತ್ತು ತಪ್ಪಾದ ಸೌಂದರ್ಯವರ್ಧಗಳ ಬಳಕೆ.
ಎಣ್ಣೆಯುಕ್ತ ಚರ್ಮದ ಆರೈಕೆಗಾಗಿ ಪರಿಹಾರಗಳು
ಎಣ್ಣೆಯುಕ್ತ ಚರ್ಮಕ್ಕೆ ಸಂಬಂಧಿಸಿದಂತೆ ನೆನಪಿನಲ್ಲಿಟ್ಟುಕೊಳ್ಳಬೇಕಾದ ಪ್ರಮುಖ ವಿಷಯವೆಂದರೆ ಅದನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು. ಆದರೆ ಅದೇ ಸಮಯದಲ್ಲಿ ಅತಿಯಾಗಿ ಚರ್ಮವನ್ನು ತೊಳೆಯಬೇಡಿ. ಅತಿಯಾಗಿ ತೊಳೆಯುವುದರಿಂದ ಚರ್ಮವು ಕೆರಳಿ ಮತ್ತೂ ಹೆಚ್ಚು ಎಣ್ಣೆಯನ್ನು ಉತ್ಪಾದಿಸಲು ಕಾರಣವಾಗಬಹುದು.
ಎಣ್ಣೆಯುಕ್ತ ತ್ವಚೆಯುಂಟಾಗಲು ಆಹಾರವು ಸಹ ಒಂದು ಮಹತ್ತರ ಪಾತ್ರವನ್ನು ವಹಿಸುತ್ತದೆ. ಕೊಬ್ಬಿನ ಆಹಾರಗಳು ಮತ್ತು ಅಡುಗೆ ಎಣ್ಣೆಗಳ ಸೇವನೆಯನ್ನು ಕಡಿಮೆ ಮಾಡುವುದು ಒಳಿತು . ಹಣ್ಣುಗಳು, ತರಕಾರಿಗಳು ಮತ್ತು ತಾಜಾ, ಶುದ್ಧ ನೀರಿನ ಸೇವನೆಯನ್ನು ಹೆಚ್ಚಿಸುವುದು ಉತ್ತಮ.
# 1 ಎಣ್ಣೆಯುಕ್ತ ಚರ್ಮಕ್ಕಾಗಿಯೇ ತಯಾರಿಸಲಾದ ಸೌಂದರ್ಯವರ್ಧಕಗಳನ್ನು ಬಳಸಿ .
ನಿಮಗೆ ಎಣ್ಣೆಯುಕ್ತ ಚರ್ಮವಿದ್ದರೆ ಅದಕ್ಕೆ ಸಾಧಾರಣ ಆರೈಕೆ ಸಾಕಾಗುವುದಿಲ್ಲ . ಏಕೆಂದರೆ ಇದರಿಂದ ನಿಮ್ಮ ಮುಖವು ಜಿಡ್ಡಿನಿಂದ ಕೂಡಿ ಮೊಡವೆಗಳು ಉದ್ಭವಿಸಲು ಕಾರಣವಾಗುತ್ತದೆ. ಇದರಿಂದ ಮುಖದ ಅಂದಗೆಟ್ಟು ನಿಮಗೆ ಮಾನಸಿಕವಾಗಿ ಹಿಂಸೆ ನೀಡಬಹುದು . ಎಣ್ಣೆಯುಕ್ತ ಚರ್ಮವನ್ನು ಆರೋಗ್ಯವಾಗಿ ಇಟ್ಟುಕೊಳ್ಳಲು ಹಾಗು ಎಣ್ಣೆಯ ಅಂಶ ಕಡಿಮೆ ಮಾಡಲು ಉತ್ತಮ ೩ ಸುಲಭ ಸಲಹೆಗಳು ಇಲ್ಲಿವೆ.
ಎಣ್ಣೆಯುಕ್ತ ಚರ್ಮಕ್ಕೆ ಉತ್ತಮ ಮಾಯಿಶ್ಚರೈಸರ್
ಹೊರಗಡೆ ಒಣ ಹವ ಇದ್ದರೆ , ನೀವು ಹವಾ ನಿಯಂತ್ರಿತ ಕೊಠಡಿಗಳಲ್ಲಿ ಕೆಲಸ ಮಾಡುತ್ತಿದ್ದರೆ ಅಥವಾ ಮೊಡವೆಗಳಿಗೆ ಔಷಧ ಹಚ್ಚುತ್ತಿದ್ದರೆ , ತೆಳುವಾದ ಮಾಯಿಶ್ಚರೈಸರ್ (light moisturiser ) ಹಚ್ಚಿಕೊಳ್ಳುವುದನ್ನು ಮರೆಯ ಬೇಡಿ . ನೀವು ಮೇಕ್ಅಪ್ ಬಳಸುತ್ತಿದ್ದರೆ, ಹೆಚ್ಚು ಮ್ಯಾಟ್ ಫಿನಿಷ್ ಗೆ ತೈಲ ಮುಕ್ತ ಸೌಂದರ್ಯವರ್ಧಕಗಳನ್ನು ಬಳಸಿ
ನಿಮ್ಮ ಚರ್ಮವನ್ನು ಬಿಗಿಯಾಗಿ ಮತ್ತು ಶುಷ್ಕವಾಗಿಸುವ ಕ್ಲೆನ್ಸರ್ ಗಳನ್ನು ಬಳಸಬೇಡಿ . ಇದು ಒಂದು ಕೆಟ್ಟ ಚಕ್ರವನ್ನು ಪ್ರಾರಂಭಿಸುತ್ತದೆ, ನಿಮ್ಮ ಚರ್ಮವು ಹೆಚ್ಚು ಎಣ್ಣೆಯನ್ನು ಉತ್ಪಾದನೆ ಮಾಡಲು ಕಾರಣವಾಗುತ್ತದೆ ಏಕೆಂದರೆ ಅದು ಚರ್ಮದ ಅತಿಯಾದ ಒಣಗಿಸುವಿಕೆಯನ್ನು ಸರಿದೂಗಿಸಲು ಪ್ರಯತ್ನಿಸುತ್ತದೆ. ಆದರೆ ಚರ್ಮದ ಹೊರಪದರ ಬಿಗಿ ಹಾಗು ಶುಷ್ಕವಾಗಿರುವುದರಿಂದ ಉತ್ಪನ್ನವಾದ ಎಣ್ಣೆ ಚರ್ಮದೊಳಗೆ ಉಳಿದು ಮೊಡವೆಗಳು ಅಥವಾ ಬ್ಲಾಕ್ ಹೆಡ್ಸ್ ಉಂಟಾಗುವಂತೆ ಪ್ರಚೋದಿಸುತ್ತದೆ .
ಯಾವುದೇ ರೀತಿಯ ಸೌಂದರ್ಯವರ್ಧಕಗಳನ್ನು ಬಳಸುವಾಗ, “ನಾನ್‌ಕಾಮೆಡೋಜೆನಿಕ್” ಎಂದು ಲೇಬಲ್ ಮಾಡಲಾದ ಉತ್ಪನ್ನಗಳನ್ನು ಮಾತ್ರ ಬಳಸಿ , ಅಂದರೆ ಅವು ಎಣ್ಣೆಯನ್ನು ಹೊಂದಿರುವುದಿಲ್ಲ ಮತ್ತು ನಿಮ್ಮ ಚರ್ಮದ ರಂಧ್ರಗಳನ್ನು ಮುಚ್ಚುವುದಿಲ್ಲ. ಈ ಮುನ್ನೆಚ್ಚರಿಕೆಯು ಸನ್ ಸ್ಕ್ರೀನ್ ಮತ್ತು ಮಾಯಿಶ್ಚರೈಸರ್‌ಗಳಂತಹ ಇತರ ಚರ್ಮದ ಉತ್ಪನ್ನಗಳನ್ನು ಬಳಸುವಾಗಲೂ ವಹಿಸಿ . ಈ ನಿಯಮಕ್ಕೆ ಮಾತ್ರ ಅಪವಾದವೆಂದರೆ ಕ್ಲೆನ್ಸರ್ ಗಳು; ಎಣ್ಣೆಯುಕ್ತ ಚರ್ಮಕ್ಕೆ ಉತ್ತಮವಾದ ಕ್ಲೆನ್ಸರ್ಗಳು ಎಣ್ಣೆಯನ್ನು ಒಳಗೊಂಡಿರುತ್ತವೆ, ಏಕೆಂದರೆ ಚರ್ಮದ ಮೇಲ್ಮೈಯಲ್ಲಿ ಮೇದೋಗ್ರಂಥಿಗಳ ಸ್ರಾವವನ್ನು ಶುಚಿಗೊಳಿಸುವಲ್ಲಿ ಅವು ಅತ್ಯುತ್ತಮವಾಗಿವೆ.
ಪ್ರತಿಯೊಬ್ಬರ ಚರ್ಮವೂ ವಿಭಿನ್ನವಾಗಿರುತ್ತದೆ . ಎಣ್ಣೆಯುಕ್ತ ಚರ್ಮ, ಒಣ ಚರ್ಮ , ಸಾಧಾರಣ ಚರ್ಮ ಅಥವಾ ಮಿಶ್ರ ರೀತಿಯ ಚರ್ಮವನ್ನು ಹೊಂದಿರುತ್ತಾರೆ . ಎಣ್ಣೆಯುಕ್ತ ಚರ್ಮವಿರುವಾಗ , ಚರ್ಮವನ್ನು ಹೆಚ್ಚು ಒಣಗಿಸದೆ , ಹೆಚ್ಚಾದ ಚರ್ಮದ ಎಣ್ಣೆಯನ್ನು ನಿಯಂತ್ರಿಸುವುದು ಅಗತ್ಯ . ಹಾಗಾಗಿ ನೀವು ತ್ವಚೆಯ ಉತ್ಪನ್ನಗಳನ್ನು ಖರೀದಿಸುವಾಗ , ಎಣ್ಣೆಯುಕ್ತ ಚರ್ಮಕ್ಕಾಗಿ ವಿಶೇಷವಾಗಿ ರೂಪಿಸಲಾದ ಸೌಂದರ್ಯ ಪ್ರಸಾದನಗಳನ್ನು ಕೊಳ್ಳಿರಿ. ವಿಲ್ಲೋ ತೊಗಟೆ ಮತ್ತು ಝಿನ್ಕ್ ಆಕ್ಸೈಡ್ ಅನ್ನು ಘಟಕಾಂಶಗಳಾಗಿ ಒಳಗೊಂಡಿರುವ ಪ್ರಸಾದನಗಳನ್ನು ಬಳಸಿ . ಈ ಎರಡು ಘಟಕಾಂಶಗಳು ಹೆಚ್ಚುವರಿ ಎಣ್ಣೆಯನ್ನು ಚರ್ಮದ ಮೇಲ್ಮೈಯಿಂದ ಹೀರಿಕೊಳ್ಳಲು ಸಹಾಯ ಮಾಡುತ್ತವೆ .
# 2: ಆರೋಗ್ಯಕರವಾದ ಆಹಾರವನ್ನು ಸೇವಿಸಿ
ನೀವು ಬಹಳವಾಗಿ ಎಣ್ಣೆ ಹಾಗು ಕೊಬ್ಬಿನ ಆಹಾರವನ್ನು ಸೇವಿಸುವುದರಿಂದ ನಿಮ್ಮ ಚರ್ಮದ ತೈಲ ಗ್ರಂಥಿಗಳು ಹೆಚ್ಚು ಎಣ್ಣೆಯನ್ನು ಉತ್ಪಾದಿಸುತ್ತವೆ ಎಂದು ವಿಜ್ಞಾನಿಗಳು ಗಮನಿಸಿದ್ದಾರೆ. ಆದ್ದರಿಂದ ನೀವು ಕರಿದ, ಕೊಬ್ಬಿನ ಫ್ರೈಸ್ ಮತ್ತು ಚಿಪ್ಸ್ ಗಳಿಂದ ದೂರವಿರಿ. ಇದರ ಬದಲು ಹೆಚ್ಚಾಗಿ ಹಣ್ಣು ಮತ್ತು ತರಕಾರಿಗಳನ್ನು ಬಳಸಿ . ಇವು ದೇಹಕ್ಕೆ ಒಳ್ಳೆಯದು ಮಾತ್ರವಲ್ಲದೆ, ಚರ್ಮವನ್ನು ಆರೋಗ್ಯಕರ, ಕಾಂತಿಯುಕ್ತ ಮತ್ತು ಶುಭ್ರವಾಗಿರಿಸಲು ಸಹಾಯ ಮಾಡುವ, ವಿಟಮಿನ್, ಖನಿಜ ಮತ್ತು ಇತರ ಪೋಷಕಾಂಶಗಳಿಂದ ಕೂಡಿವೆ .
ನೀವು ತಿಳಿದುಕೊಳ್ಳಬೇಕಾದ ಒಂದು ವಿಷಯವೆಂದರೆ ವಿಟಮಿನ್ ಎ ಮತ್ತು ಬಿ 5, ಚರ್ಮದ ಮೇಲಿನ ತೈಲ ಗ್ರಂಥಿಗಳನ್ನು ಆರೋಗ್ಯಯುತವಾಗಿ ಮಾಡುವ ಜೀವಸತ್ವಗಳು . ವಿಟಮಿನ್ ‘ಎ’ ಯು ಕ್ಯಾರೆಟ್, ಮಾವಿನಹಣ್ಣು, ಕೋಸುಗಡ್ಡೆ ಮತ್ತು ಪಾಲಕ್ ಸೊಪ್ಪಿನಲ್ಲಿ ಹೇರಳವಾಗಿರುತ್ತದೆ . ವಿಟಮಿನ್ ಬಿ 5, ದ್ವಿದಳ ಧಾನ್ಯಗಳು, ಮೊಟ್ಟೆ ಮತ್ತು ಮಾಂಸದಲ್ಲಿ ಇರುತ್ತದೆ .
# 3: ಉತ್ತಮ ಪೌಷ್ಟಿಕಾಂಶಗಳ ಪೂರೈಕೆ
ನಿಮಗೆ ನಿರ್ವಹಿಸಲು ಆಗದಷ್ಟು ಎಣ್ಣೆಯುಕ್ತ ಚರ್ಮವಿದ್ದರೆ , ಅದಕ್ಕೆ ವಿಟಮಿನ್ ಎ ಮತ್ತು ಬಿ 5 ಜೀವಸತ್ವಗಳನ್ನು ಉಳ್ಳ ಆಹಾರವನ್ನು ಸೇವಿಸಬೇಕಾಗುತ್ತದೆ . ಅಥವಾ ಇದೇ ಜೀವಸತ್ವಗಳುಳ್ಳ ಮಾತ್ರೆ ಅಥವಾ ಕ್ಯಾಪ್ಸುಲ್ ಗಳನ್ನೂ ಸೇವಿಸಬಹುದು . ವಿಟಮಿನ್ ‘ಎ ‘ ತೈಲ ಉತ್ಪಾದನೆ ಮತ್ತು ತೈಲ ಸಂಬಂಧಿತ ಮೊಡವೆಗಳನ್ನು ತೀವ್ರವಾಗಿ ಸುಧಾರಿಸಬಹುದಾದರೂ, ಇದರ ಅಡ್ಡಪರಿಣಾಮಗಳೂ ಇರುತ್ತದೆ . ವಿಟಮಿನ್ ಬಿ 5 ಪೂರಕಗಳನ್ನು ತೆಗೆದುಕೊಳ್ಳುವುದು ಸುರಕ್ಷಿತ. ಇದು ತೈಲ ಗ್ರಂಥಿಗಳನ್ನು ಮುಚ್ಚದೆ ಚರ್ಮದ ಮೇಲೆ ತೈಲವನ್ನು ನಿಯಂತ್ರಿಸುತ್ತದೆ ಮತ್ತು ಕಡಿಮೆ ಅಡ್ಡಪರಿಣಾಮಗಳನ್ನು ಹೊಂದಿರುತ್ತವೆ. ಆದರೂ ಅತಿರೇಕಕ್ಕೆ ಹೋಗಬೇಡಿ. ಆದ್ದರಿಂದ ನಿಮ್ಮ ಕುಟುಂಬ ವೈದ್ಯರೊಡನೆ ಚರ್ಚಿಸಿ ಇದನ್ನು ತೆಗೆದುಕೊಳ್ಳುವುದು ಒಳ್ಳೆಯದು .
